لعبة "امير بلاد فارس " من بين اكثر الالعاب لي قصرت فحياتي, و لي ديجا سامع بيها غادي يعرف بلي فيها اجزاء كثيرة و انا شخصيا كان كايعجبني الجزء ديال " رمال الزمن " او بالفرنسية " Les Sables du temps " لي صدر فسنة 2003 على اجهزة بلايستيشن 2 و 3 و ايضا جهاز الكيم بوي و الاكس بوكس ,و اللعبة كاتهضر على واحد الامير شهم من بلاد فارس " ايران حاليا " لي غادي يمشي هو و الجيش ديال باه شاهرامان ل الهند باش يزوروو مملكة أزاد , فهاد اللعبة الامير غادي يكون عندو واحد الخنجر لي كايتسما خنجر الوقت و لي وزير المهراجا الشرير باغي يحصل عليه باش يستافد من القوة لي كايمنحها للمالك ديالو و ف التالي غادي يلعب على الامير باش يدي ليه الخنجر وغادي يخليه يحرر الرمال و الامير ماكانش عارف بلي ديك الرملة غادي تجمد كاع الناااس لي ف القصر ولكن لحسن الحظ بقا هو و الوزير و بنت المهراجا" فرح " لي غادي تعاون الامير ديالنا باش يهرب من الوزير الشرير و هنا كاتبدا الحفلة . اللعبة عجباتني حيت فيها طابع روائي كاتحس براسك بحال ايلا متبع فيلم تاريخي و كاتبقا مقاتل باش تطلع الامير من مستوى الاخر و نتا كلاعب خاص تعرف مزيان كيفاش تستعمل خصائص الخنجر و السلاح لي كايخليك تسيطر على الوقت و ايضا خاصك تعرف كاع الفخووخ و تجتازهم بنجاح و عموما ديزاين ديالها جد موفق فديك الوقت فاش خرجات اللعبة , و ايضا قصرت الجزء لي خرج ف 2010 بعنوان ' The Forgotten Sands " و لي صدرات ف اجهزة الويندوز و الاكس بوكس و البلايستيشن 3 ولي حتا هي كاتبدا بالسرد بحال الستايل ديال القصة و فهاد الجزء الامير ديالنا غادي يبغي يمشي يشوف الاخ ديالو باش يعلمو كيفاش يكون قائد قوي ولكن ملي غايوصل غادي يلقا المملكة كاتعرض لهجوووم و فالتالي هنا كاتبدا المغامرة ديال صديقناا و شحال تشقلبنا مع الحيوط و حنقزنا من شرجم ل شرجم و ايلا طحتي كتعااود من جديد , و اللعبة كاتبغي ذكاء حيت بعض المراحل ماكاتبقاش عارف راسك منين غادي دوز وكايخصك تفكر مزيان وتحلل باش تعرف تخريجا و كاتبقا موانس مع الهضرا ديال الراوي و الامير غادي يكون عندو واحد البوفوار ديال القدرة على الرجوع بالزمن بحيت ملي كاتوصل لشي مستوى كاتقدر تشوف شنو طراا تما من قبل وفالتالي غادي تعرف تزطط راسك ف الطرح . وفالتالي فهي لعبة ممتعة و تحية لاي واحد لعبهااا خصوووصا دوك لي كايلعبووو من اجل مشاهدة التيتيزة فرح هههه .
