تعويم الدرهم

الدرهم غادي يعوم وحنا غادي نغرقو معاه ، حيت باش تحرر قيمة العملة ديالك الفقيرة خاصك تكون دولة مصنعة ، كاتصاوب الصوارخ و التليفونات و الماكينات بأشكلاها وكاتصدر كثر ما كاتستورد  ، وطبعا هدشي ماكاينش فالمغرب و من الفوق حنا ديجا عندنا عجز تجاري ،  ماعدا ايلا كنا معولين على غضيفة من خميس زمامرة لي كاتربي الدواجن تهز لينا اقتصاد البلاد ( طبعا هادا ماشي تحقير ) ولكن الواقع  هوا هادا حيت الفلاحة والصيد البحري ماغادي يديرو لينا حتى لعبة ، وباش نشرح ليكم كثر ، دابا سابقا قيمة الدرهم كانت مرتابطا بالاورو والدولار يعني ايلا طلعو فالقيمة ديالهم ، الدرهم ايضا كايطلع و ايلا هبط كانهبطو معاهم ، و دابا ماغانبقاو متعلقين بحتا عملة يعني الدرهم خصو يولي ساوي فالسوق وباش يولي ساوي خاصنا نوليو نصدرو للدول الغربية  الاجهزة وماجاورها وطبعا هدشي ماعندناش  , دكشي علاش غادي تولي قيمة الدرهم شبه منعدمة و فالتالي نتا ككائن شمال افريقي ملي غاتمشي تشري شي حاجا ف السوق تقدر تقام عليك ب تريبل ديال الثمن باش كنتي كاتشريها ديجا يعني ثلاجا  د 8000 درهم تقدر تشريها ب 2 دالمليون و هنا نقدرو نطيحو فأزمة خطيرة وللاشارة هادشي ماشي المغرب لي ختارو ولكن تفرض عليه من طرف صندوق النقد الدولي حيت عيقنا عليهم بالكريديات و واخا المغرب نقص الصاليرات للموظفين ،واخا زاد ف ثمن مجموعة من المواد الاساسية و مع ذلك الديون باقي كاااينا و االامر يزداد سوءا في كل مرة..
ولكن ملي كانجيو نحللو هدشي من زاويا اخرى ، ف راه كاينين مجموعة من خبراء الاقتصاد و ماكانظنش بلي هوما اغبياء حتال هاد الدرجة باش يلوحو المغرب للهاوية ، من جهة راه التعويم غادي يكون جزئي و اظن ان االمغرب كايخطط باش يدخل لعالم الصناعة والتصدير شويا بشويا و لكن ضروري من اننا غادي نتضررو فالاول ولكن اذا المغرب زعم و حاول يشجع الشباب و الطاقات ديالو و يولي  يديها ف الضومين ديال الصناعة راه نقدو من هنا لواحد 3 سنين نوليو بيخير علينا ..طبعا هادشي ايلا كانو دوك الخبراء كايفكرو سينون ايلا كانو غي مكدمين ف راه هزنا الما و غادي نوليو نتقاتلو علا المحراش و لكومير و موحال نلقاوه...

#خربشات_مريم_بنعلي