شحال من واحد فينا كايكون عندو عيد ميلاد و ماكاين لي كايعبرو و فالمقابل كاتلقا ثاابثة رياااضية كايديرو ليها الناس النهار و كايحتافلو بيها .
-هنا الهضرا على الثابثة الرياضية π لي عندها عيد ميلاد اليوم 14 مارس و كايحتافلو بيها الناس في مختلف الجامعات العلمية و التكنلوجية , و كايتعتابر الفيزيائي و الفنان " لاري شو " اول من احتفل بهاد العيد سنة 1988 ومن تما و الناس كايحتافلو ب هاد النهار .
-الثابثة "بي " هي عدد غير مظبوط و لي كانستعملوه ف بزاف ديال الحوايج و ماكاينش فينا لي ماحسبش قطر الدائرة و فالتالي غادي يكون استعمل هاد الثابثة لي جرت العادة كانعطيوها هاد القيمة 3.1415926 و ف التمارين ديالنا كانستاعملو فقط رقمين بعد الفاصلة 3.14 .
- وبزاف منكم غادي يتساءل علاش كانحتافلو بهاد العدد اليوم بالضبط , والجواب بسيط حيت تاريخ اليوم هو 3/14 ' بالتأريخ الانجليزي " و لي كايمثل الارقام ديال هاد الثابثة , و كاتعتابر سنة 2015 من اكثر السنوات المميزة حيت كان التاريخ هو شهر 03 يوم 14 سنة 15 و لي كاتضمن الارقام الخمسة ديال ثابثة " بي " .
- فالمدارس الامريكية و البريطانية خصوصا الابتدائي الاساتذة كايديرو انشطة علمية فهاد اليوم و التلاميذ كايجيبو الحلوى وهدشي كامل باش يحفزوووهم على الدخول للميادين العلمية و يحببوهم ف الرياضيات و الارقام بل اكثر من ذلك كاينظمو مسابقات و تظاهرات كبيرة
و الصدفة هي ان يوم 14 مارس هو عيد ميلاد العالم البرت اينشتاين و دكشي لي كايزيد يعطي لهاد اليوم قيمة وللاسف هاد التاريخ هو نيت فاش توفى ستيفن هوكينغ ...
عموما بحال هاد الاحتفالات هوما لي خاص يتعممو على العالم ولكن للاسف ماكانظنش ان دول شمال افريقيا و الشرق الاوسط مسوقين لهادشي حيت فالاصل ماعاطيينش قيمة للعلم .
و اخيرا لي بغا يعرف كيفاش كانحسبو هاد الثابثة بالضبط اليكم الرابط اسفله لي مشروح فيه الطرق الرياضية و الهندسية باش كاتحسب "
https://fr.wikihow.com/calculer-Pi
عيد ميلاد سعيد يا π