عتقوني , واش ماعندكش ختك ؟

ملي كنت صغيرة كانو واليديا كايديرو ليا النهار ايلا سلفت دفتر عند شي حد ومارديتوش ليه فالوقت بدعوى ان السيد غايبغي يقرا وانا غانعطل عليه المراجعة ديالو ، كنت غي ايلا خلص عليا شي حد من اصدقائي فالابتدائي شي حاجا فالحانوت من قبيل ميروندينا و رايبي ، كنت كانسمع بزاف ديال العتاب بدعوى انني بحال ايلا ستغليت هاد الشخص ماديا ..حتى ملي كبرت ، ضحكت واحد المرة مع واحد الصديق وضربتو غي بالتقشاب ونهار تلاقا ب مالين الدار قاليهم بنتكم كاتعدا عليا و غي بالضحك فإذا بي كانسمع جريدة الاخبار لمدة 24ساعة غي حيت ضربت السيد ، من ديما اي تصرف ناقص كانديرو ضد الاخر ماكانوش كايتسامحو معايا او كايتعاطفو وديما كايجيو ضدي وماكايعقلوش عليا نهائيا و النهار الكحل ايلا تشكا مني شي حد واخا نادرا حيت كنت فتاة مهذبة ( ومزال ) و فالحالات لي انا كانتظلم فشي حاجا كانلقاهم فجنبي ، لازلت اتذكر نهار قمشاتني واحد البنت ف الثاني فوجهي ، شد ليا بابا فيدي و بدا كايقلب على دارهم بيت بيت زنقة زنقة باش يهضر معا باها وكان غايدير بيهم شكاية كون ماطلبتوش يتنازل 😂..
اليوم بزاف ديال الاصدقاء ديالي ماكايعجبهمش الحال ملي ماكانوقفش معاهم فبزاف ديال الحالات ، حيت ماكبرتش على داك الاساس ديال " انصر اخاك ظالم او مظلوم " ، تربيت على اساس " انصر اي انسان مظلوم " .
وصراحة من ديما فاالدار مدخلين لينا فكرة انه ايلا درنا شي ذنب و يستاهل الحبس ماغاديش يعتقونا😂 و هاكا كبرنا ناس مسالمين ماكانتعداو على حد.
الوالدين هم اول الاشخاص لي خاص يكونو ضد ولادهم ملي كايضصرو و ايلا كتبت هادشي غي ردا لديك السيدة لي كاتبكي علا ولدها لي تعدا على بنت صغيرة و كاتناشد اعلى سلطة فالبلد باش تطلقو ...وهاد سيناريو تكرر عند جميع الاباء ديال المعتدين لي بانو طيلة السنوات الاخيرة ف شوف تيفي ماعدى القليل ..التساهل ديالك أ لميمة و التربية للعوجا هي لي كاتعطي امثال ابنك ..عذرا ايتها الام لكن حتى نتي كاتساهمي فتفشي الاغتصابات و الاعتداءات ، و ولدك ماشي طفل صغير ، ولدك عندو 21 عام ..الضحية الوحيدة فالقصة راه معروفا. .