شحال هادي كان الدين كايوقف ف وجه اي واحد يدعي العلم وبالضبط الكنيسة لي كانت كاتصفيها لبنادم بمجرد يبان فيه شويا د النور , و اليوم غادي نعطيكم نموذج ديال واحد السيدة لي عطاات للعلم و العلووم و قليل لي كايعرفها , شخصيتنا اليوم سميتها ' هيباتيا' فيلسووفة و بالضبط مختصة ف الفلسفة الافلاطونية و كذلك اول امرأة عالمة رياضيات ف التااريخ , تزادت هيباتيا في عام 380 ميلادية و بالضبط ف الاسكندرية و أصلها يوناني , و ديك ساع مصر كانو حاكمينها الرومان ..مشاات هيباتيا لأثينااا و تما تعلمات مجموعة من العلوم و اصلا الواليد ديالها راه كان عالم ديال الرياضيات و قرااها مزياااااان و ملي رجعات لمصر سخرات كامل الوقت ديالها باش تعلم الناس و تقريهم و كانت كاتعرف حاجة وحدا لي هيا " العلم " ماكانتش مسوقا ل بناادم و ماعندهاش علاقات عاطفية واخا بزاف ديال الشباب كانو كايتقربوو منها خصوصا التلاميذ ديالهاا بحكم انها زوينة بزااف و خلوقة و متوااضعة و عقلها عاامر ولكن هياا وتقوول واش داتهااا ف شي مخلوق و كانت كاتقضي وقتها كلو ف الدراسة و الابحاث العلمية , صديقتنا كانت ديما منعزلة و ماكاتحملش تخرج و تلاقا معا الناس ولكن نهااار توقف قدام القضاة كانت كاتخرج منهم السمن الحر , كانت شديييدة بزاف و داكشي علاش اكتسبت احترام الكثير من الناس و للي ساعدها اكثر هو العلاقة ديالها الطيبة مع حاكم الاسكندرية " اورسطوس " لي كان معجب بالفكر ديالها و كايساااندها ف الخطوات لي كاتقوم بيها ولكن ف نفس الوقت كان ناض مشكل سياسي بين ارسطوس و الكنيسة لي اصلا ماكاتحملش هيباتيا حيت كانوو خايفين من انها تساهم ف تنوير عقول الشباب , حيت كانو هوما كاينشرو ثقافة الجهل و التكلاخ و كانو كايستحمرو بنادم وهادشي لي بغاو هوما و خصوصا ان الشباب الميسحيين كانوا كايحضرو للدروس ديالها و متبعين معاها ف الخط و هادشي ماشي ف مصلحتهم و كانوو رجال الدين المسيحيين كايوصفو افكارها ب الكفر و الخروج عن الدين .. ربما حيت هيا كانت من الفلاسفة المنطقيين لي كايدافعو على الحق ف التساؤل و كانت ضد الايمان المجرد يعني ايلا غادي تامن بشي حاجة حتا تامن ببيها بعقلك اولا عاد امن بيها ب قلبك , و فالتالي قررات الكنيسة تغبر ليها الشقف باش ماتبقاش تأثر ف الشباب و باش ماتنشرش العلم ديالها باش يبقاو الحوالا ناعسيين و هادشي لي طررا , حرضوو مجموعة من الشباب لي كايقراو عندهاا و واحد نهار تسناوها حتا خرجاات و هوما يتبعوهااا و تهجموا عليها بشراسة و عنف و جرجرووها ف الشواعر ديال الاسكندرية' كما توضح الصورة اسفله " حتا مااتت ف عمر يناهز 35 سنة تقريبا , و من ابرز ماجابت هاد الفيلسوفة العالمة للعالم هو قيامها ب رسم الاجرام السماوية و ايضا اختراعها ل مقياس ثقل السائل النوعي لي كايقيس كثاقة و لزوجة السوائل
و فالتالي نفس الكواسط كايتعاودو ف التاريخ و هادشي كايبين الخوف ديال الناس لي كايستغلو الدين و السياااسة من العلماء بحال هيبااتايا لي كايخرجو الناس من الظلمات ل نور العلوم , و هاد الناس لي كايحكمو بالجهل و عندهم فكر متعصب لا يتقبل حرية الاختلاف راه مازالين ليومنا هذاا كايديرو العصا ف الرويضة لاصحاب الفكر الحقيقي , وللي بغا بعرف اكثر على هاد الشخصية العظيمة يتفرج ف فيلم agora لي كايحكي القصة الكاملة لهاد السيدة .
و فالتالي نفس الكواسط كايتعاودو ف التاريخ و هادشي كايبين الخوف ديال الناس لي كايستغلو الدين و السياااسة من العلماء بحال هيبااتايا لي كايخرجو الناس من الظلمات ل نور العلوم , و هاد الناس لي كايحكمو بالجهل و عندهم فكر متعصب لا يتقبل حرية الاختلاف راه مازالين ليومنا هذاا كايديرو العصا ف الرويضة لاصحاب الفكر الحقيقي , وللي بغا بعرف اكثر على هاد الشخصية العظيمة يتفرج ف فيلم agora لي كايحكي القصة الكاملة لهاد السيدة .
