ماعمرني كنت من المدافعين ديال سعد المجرد و دياسك ديالو بحكم انني غير متتبعة للهيت المغاربي والعربي عامة ولكن كلمة الحق تقال ، عندي بزاف ديال قنوات ( الرياكشن ) او ردود الافعال ديال اليوتوبرز الامريكيين ، و لقيت بلي بزااااف منهم دار رياكشن علا الفيديو كليب ديال اغنية المجرد الاخيرة ، و دخلت نتفرج باش نشوف هاد لميريكان اش بان ليهم فالديسك د المجرد و كانتفاجئ انني كانلقاا كل اليوتوبرز عجباتهم الاغنية و خصوصا ريييتم ديالها و كاينوضو يشطحوو و ينقزو وماكاين لا انتقاد لا ستة حمص ، هنا كحل الراس غادي يقوليك ايوا رييتم زوين ولكن ايلا عطيناهم الكلمات غادي يعلقوووو و هنا غادي نجاوبك اعزيزي وعزيزتي سير هز ترجم ديسباسيتووو لي دارت خبلا فالعالم ، راه الكلمات لا علاقة و تحت صمطاا من لفوق ومن غير ديسباسيتو ، شوف دياسك ديال ريهانا لي صراحة مغنية واعراااا ، مثلا ديسك ديال ( وررك ) ايلا جيت ترجمو راه ماعندو حتا معنى ( العمل ، العمل ، العمل ، هوا قالي خاصك العمل العمل العمل ،راه هو كايشوفني كانخدم ف لوسخ لوسخ لوسخ) ..الخ و نمشيو لاعظم المغنيين د البوب من سيااا ل ادييل ل تيمبرليك ل لي عجبكم ، راه ايلا ترجمتي داكشي غاطيح فدياسك من قبيل ( لمن نشكي حالي ، ونتي سباابي ؛ و البيضا مون امور ) ، يعني نفس الشيء لكنكم تحبون الكفار و تقريبا دياسك الوحيدين لي تقدر تلقا فيهم شويا د المعنى هوما ديال روك كاتلقا الموسيقى عميييقة و الكلمات كايعالجو شي قضية داكشي لاش من ديما كانتمزك ل روك ولكن من بعد وليت كانتسنط ل بوب اميريكان حيت كاينني شي نهارات كاتبغي غي تسمع ل ( سوالالالا و ويكل ويكل ويكل و وروك وورك ) الخ و علاش كانتمزك للغرب بزاف ماشي تعصبا وانما حبا في تعلم الانجليزية وداكشي لي ولفت من صغري و حيت احب ثقافة داك الشعب و مع الوقت تعلمت انني مانحكر علا حتا شي نوع موسيقي ، شحال هادي كنت كانحتاقر ناس لي كايتسنطو ل حجيب والشعبي ولكن فهمت ان الموسيقى اذواق وماشي من حقي نسبك ولا نعتابرك حمار ومكلخ حيت كاتمزك لنوع موسيقي معين ( هادشي طبعا لي شفنا العكس ديالو فالمغرب ) بنادم ولا داعشي من ناحية الموسيقى و بانو ليا كايقشبو علا المتابعين د المجرد ! لي كيما كاتشوفو وصل حتا لميريكان و شكروووه و حنا مازال لي بارطاجا اغنية الستاتي كايتسما عروبي و جاهل و لي بارطاجااا نيرفانا كايتسما من عبد الشياطين و لي بارطاجا ل بينك فلويد كايتسما ملحد و لي بارطاجا ل سعد المجرد كايتسما عنيبة....تعلموا تحتارموا اذواق الناس و تقدرو مجهودات اي مغني و تعتارفو ايلا شي حد قدر يوصل لشي حاجا و اهم الشيء هو نتعلموا نحبو الجميع...
***********
ملاحظة : السجل العدلي ديال المجرد لا يهمنا حاليا حيت كاناقشو الموسيقى وماشي قضايا اجتماعية و حتا يخرج الحكم ديالو و نهضرو ديك ساع فهادشي
***********
ملاحظة : السجل العدلي ديال المجرد لا يهمنا حاليا حيت كاناقشو الموسيقى وماشي قضايا اجتماعية و حتا يخرج الحكم ديالو و نهضرو ديك ساع فهادشي
