- بزاف د البنات مؤخرا في الفايسبوك بانو ليا لاحو بوسطات كايتشكاو من السلوكيات ديال بعض الكائنات التي لا تمت ل البشر بصلة ، كاتكون البنت لابسا جلابة ، كسوة طويلة ، عصري او بلدي ، فأكيد غادي دوز حداااا واحد ماكاميش لاضوز ديالو و غاتمسع ديك العبارة التي اعتدنا على سماعها في رمضان ( راه صايمين اختشي ، اللهم اني صائم ) ، و غالبا هاد الناس كايكونو صايمين غي بزز و كايتسناك تجاوبيه باش يلقا الفرصة فين يترمضن عليك و يديرك سبة !! اما لي صايم ايمانا و اقتناعا كاع ماغايطلع فيك شوفة من الاصل . و هادشي كامل كايخلينا نطرحو واحد التساؤل ، عزيزي الذكر واش ف الايام العادية ملي كادوز حداك البنت و كاتشوفها كايخسر ليك الوضوء ( راك فاهم ) ؟؟؟ ، واش بمجرد تمشا قدامك الفتاة بدون ماتدير حتا شي حركة مثيرة و بدون تعواج او تبعكك وسطرو مزيان على هادشي يجن جنوونك وكاتفقد السيطرة على الحواس ( الاعضاء ) ديالك ؟ ، اذا كان الجواب ب نعم فأكيد خاصك تمشي تعالج حيت هادشي كغااف و تجاوزاتو البشرية فالعصور الطباشرية ملي الغريزة الحيوانية كانت مسيطرا على بنادم و ضورري تزور عيادة طبيب نفسي او ربما طبيب الامراض التناسلية لايكون عندك شي خطب ، و اذا كان الجواب ب لا ، ف علاش ف رمضان كاتفرع لينا راسنا ؟! علاش فيما دوز شي بنت ما جبداتك ما عبراتك ما ادااتك كاتمشي تبرزطها و تزيد تكرها ف الانثوية ديالها كثر ماهيا مكروهة ؟ واش بغيتي تخرج البنت للشارع وتسمعك ( خويا ستر رجليك راه رمصان هادا راه شورط كايفتن ، خويا ستر يديك راه دوك العضلات كايفتنو ، خويا ستر شعرك راه دوك زغيبات كايفتنو ) و تبقا تعاود ليك هاد لكاسيطا يوميا واش ماغاتحملش راسك ؟؟؟! ايواااا عطيو تيقار للدريات ف رمضان و لا غيرو و ايلا صايم راك صايم ل االله ، ماشي حاضي العباد اش لابسين وفين خارجين ، و ماتنساش بلي الشارع ماشي ديال باك و انما ديال الجميع و كيما نتا عندك حريتك ، حتا البنات هن احرار ، و كل واحد بينو و بين راسو بلا ماتحاول دير فيها مصلح ( مفسد ) اجتماعي ، و قبل لاتخرج شي كلمة من فمك دورها ف لسانك 99 مرة باش ماتعكسش التطور ديالك و تمسخ ل حلوف في اقل من دقيقة .
