الشارفة المشرملة 2

#الشارفة_المشرملة2

اللغز ديال الشارفة دار لينا طيارة فداك رمضان ، و المشكل ماعندا عليها حتا معلومة فين نقدرو نلقاوها تال واحد النهار كنا واقفين فنفس البلاصة فين شفناها اول مرة ، عاطينها للجماعة و تقرقيب الناب الحلال طبعا شي ساعة باش يالاه نجيبو اذان المغرب ، و بينما كنت كانبرق عيني ف التلفون دييالي ، هضرات صاحبتي و قالت '' اجي ماشي هاد المرأة لي جايا من تما هي الشارفة ديال داك النهار ؟ '' و انا نطلع راسي دغياا قلت ليهم والله ايلا الشارفة بشحمها ولحمها و عطرهاا لي كايدخل للمناخير ديالناا و كايعشش فيهم اساابيع و كايخلي واحد الرائحة تدوووم و تدووم و تدوووم ، الصراحة تخلطو عليا الاحاسيس و المشاعيير ، خفت واحد شويا ولكن شدااتني الفرحااااا قلت اراك للمغامرة عاوتاني ، ماكاين مايدار هاد العشية ، باش تشووفو البنات الحادكات ف رمضان كايدخلو للكوزينة يقادو الشهيوات و ما لذ و طاب و انا كانطييب ف الخطط و البلانات مع شي حماق بحالي بحالهم ، للمهم اسيدي بدينا كانفكرو واش نسولوها على الرسالة ديال داك النهار او لا نخليوها تدوز و نطمرو بحال ايلا ماعرفناهاش ، و باش نوصفها ليكم اكثر السيدة لابسة نفس الملحاف و وجها مجلخ بنفس الحالة و لكن هاد المرة دايرة صباغة الاظافر للاصابع ديال رجليها ولابسة صرفاقة من فئة حلومة و كالعادة المنظر ديالها كايجيب التبوريشة ، الشارفة فاتناا و كاع ماشافت فينا و زادت مع الشارع الكبير هو يقول لينا الصديق ديالي مولود مكااين مايدار ياالااه نتبعوها و ف الطريق نديرو شي طريقة باش نجبدوها بالهضرة و نزربو عليها ...المهم تبعناها و كانت سابقنا ف الطريق و تصورو البلاصة منين كادوز كلها خانزاا بديك الرائحة للي كاتستعمل و ملي كانقولكم البلان د الريحة راه لا اباالغ وانمااا راه شي حاجة بزاف ، المهم بقينا تابعينها ، زيد ، زيييد ، زيييد شويا كاتبان لينا مشات لشي ناس فواحد الطوموبيلل و دقات عليهم ف الزاج و ماعرفت اش كانت كاتزعت عليهوم بحكم خلينا مسافة بينا و بينها و ماسمعناش ولكن قدرنا نشووفو ان مول طوموبيل كسييييرا و زاد وخلاها ، تما حطينا احتمال ان الشارفة تقدر تكون مزنزنة و ماشي تال لهيه ...و شويا غاديين و هيا تبان لينا واحد الطوموبيل و قفات ف '' قف'' و مشات تاني كاتهضر مع الناس لي فديك الطوموبيل ولكن طمرو عليهاا و حنا استغلينا ديك الفرصة و سبقناها فالطريق بغينا نعرفوو واش غادي تحاشيها لينا ولا لا ، و السيدة قربااات ليناا و ايلا ماقلت بلي كاينا مورانا بالضبط ، انا و فاتي و مولود قطعنا الحس و مرة مرة كانهضروو ف شي مواضيع دراسية ولكن فجأة الشارفة تخرج عن صمتها و تكلمات و قالت لينا '' البناات ايمتا نهار 1 فالشهر . و طبعا درنا عندها و بقينا مطلعينها و شدينا معاها الستون و فهاد اللحظات مولود هز البورتابل مع قلت ليه يصورها و لكن للاسف كان الشعااا بزاف و ماكاتبانش الصورة واضحة...و لكن السؤال لي دار لينا فالراس واش عقلات علينا او لا ؟؟؟... من بعد حديث تطلاعي على الشارفة تصدراات و سبقاتنا تاني فالطريق و الملحاف ديالها كان مهزوز شويا واحد اللحظة كايبانولينا رجليها و يا ريييت ماشفناهمش ..الجهة الخلفية د الرجلين بزوج مشرطيين و فيهوم واحد سيكاتريس كبيرااا و كايبان بلي كاين جرحات قدام و شي وحدين باقين جدااااد و طريين ، تما تزعزعنا و تكمشنااااا وا هادي ماتكون ها شي مجرمة على هاد القبل ...خليناها سابقانا فالطريق و كنا دايزين حدا محل تاع الحوايج و قالت لي فاتي '' زوينة هاد اللبسة ا مريم '' هي تدور عندنا الشارفة و قلت مع راسي واا هاد الاذنين عندك موحال واش ديال بنادم حيت قدرات تسمعنا مع انها بعيدة علينا ببضع امتار ، المهم قالت لينا " اااه بصااح ، زوينين هاد لباسي ، العيد قرب خاص نشري شي لبسة " و ديك اللحظة بالضبط مولود ماقدرش يضبط اعصابوو و دخل فيها طول و عرض و سولها من الاخر واش هيا للي كتبنا ليها الرسالة داك النهار و فاللبلاصة جاوبات قالت اااه هيا انا ' ' يعني عرفااتنا هاد الشارفة من الاول ''مع الجوااب ديالها كان سريع جدا ، مافكراتش ولا حققات فينا ، ديريكت جاوبات ...و حنا سولناها اش دارت مع ولدها هي تجاوبنا و قالت'' عرفتي التليفونات ما بغاو يشدو .و وصلاتني واحد الموكالمة خطيرة من واحد ولد الحرام ماعرفت واش مجرم و لا قتال حبس ليا كاع النوامر ديال العائلة ..مووجريم كاع التلفونات قفلهوم ليا ، بغيت نهضر مع ولدي ولكن موجريمين هادوك موجريمين '' و سولناه اش بغات تدير بالرسالة '' قالت لينا بغيت نصيفطها ل ولدي ف لبوسطا و لكن العنوان بدلوه ، القتال لي بدلو و بلا بلا بلا بلا '' و انا نقوليها علاه فين كاين هاد ولدك...قالت لينا ولدي كاين ف ميريكان و مازال ماهضرت معاه و مع العائلة '' حيت النوامر مقفولين و المجرم للي تاصل بيها هو لي قفلهوم عليها ''.. هنا بدينا كانسمعو للتخربيق ، اشمن مجرم و كيفاش بلان الرسالة لي مازال مابغات تفهم لينا ، و واش بصاح ولدها كاين ف ميريكان ؟ و واش الشارفة من نيتها باغا تصيفط الرسالة ف البريد ولا بغات غي تصدرنا ؟؟! المهم قلنا ليها الله يعاون ا فلانة و خليناها و لكن مازال ما سالات هاد القضية...لان تاحد منا ما تيق ديك القضية ديال غاتصيفط الرسالة ل ميريكان ..و شنو القصة ديال رجليها لي كاع مشرملين وعلاش كاتوقف عباد الله ف الشارع ؟ هادشي لي غادي نعرفووه من بعد فالحلقة القادمة ، يوووبتباع
#خربشات_مريم_بنعلي