الشعب المغربي عايش فالمغرب و بغا يولي بحال الدول الاوروبية ، و ملي كاتجي كاتشوف هاد البلدان كاتلقاهم خداامين بالنظام الديموقراطي الليبرالي (حيت الديموقراطية بوحدها اصبحت متجاوزة ) و هاد النوع ديال الانظمة هو لي كايضمن حقوق جميع الافراد في المجتمع على عكس الديموقراطية لي كاتعطي الحق ل الاغلبية فقط و كاتغمق على الاقلية كيما كايطرا فالبلدان ديال العالم الثالث ، و هنا كاتلقا التناقض ، ف صاحبنا عومار لي كايقيل يغوت فالفايسبوك بلي هو ضد اي شخص مختلف عليه ( ثقافيا ، ايديولوجيا ، عرقيا الخ ) باغي يمشي ل الولايات المتحدة باش يدير لعاقا ولا عند عمتو ف فرنسا باش يرجع ف صيف و هاز معاه لباكيات د شكلاط والفانيد باش يعيق علا صحابو فالمغرب و هاد الدول عندهم نظام ديموقراطي ليبيرالي جمهوري ، و صديقتنا عزيزة نعاماس لي تشبع سبان فالكروبات فالبنات لي عندهم نزعة ثورية و كايدافعو على مبادئ معقولة و لي كادخل ضمن الحريات الشخصية حتا هيا باغا تمشي ل نكلييز باش ضرب الحطة اخر صيحة و تشبع روايح و ماكياج و نسات بلي ديك الدولة عبارة عن دولة ديموقراطية ليبيرالية و لي عندها الملكية دستورية بحال اسبانيا و كندا ايضا !!! و غيثة لي كان كلها امل تمشي ل ألمانيا باش تقرا و تخدم تمااا و فعلا اداكشي لي طرا ، دوك الناس بسباب النظام لي عندهم قبلوها واخا هي محتجبة و خلاوها تمارس الشعائر الدينية ديالها كيفما بغات و تدير الدعوة للدين ديالهااا و فالاخير غيثة خرجااات كاتحيح ملي سمعات بلي ف بلادها الام 2 دراري خرجو فطرو ف زنقااا فرمضان و طالبت بأقصى العقوبات لهاد الناس حيت قالت ليك ماشي من حقهم حيت كايخدشو المشاعر ديال الاغلبية ، و دابا السؤال هنا ل غيثة ، نتي األالة ماكاتخديش المشاعر د دوك الناس لي مختالفين عليك فديك البلاد هممم ؟ ولا بغيتو الديموقراطية والليبرالية غي عندكم ، حلال علينا و حرام عليكم ! غيثة و بزاف بحالها عايشين كيفما بغاو ف بلادات الناس و كايجيو ينبحو علينا ب خطابات شعباوية لا اساس لها من الصحة .
دابا اصديقي لي كايحلم يمشي لبرا و هو عقليتو مطابقة لعقلية اول هوموسابيان بان فالارض ،مع احتراماتي للهووموسابيانز و قالك باغي يمشي لبرا ، واش من نيتك؟ ! الشعب المغربي بغا المسواة و ماباغيش الديكتاتورية و هو براسو ديكتاتوري و كايمارس السلطوية على الاقليات فالمغرب ، كايتشكا من الاحزاب و السياسة و نسا راسو بلي حتا هو كايهمو غي راسو و غي مصلاحتوو و كايغمق على بزاف ديال الناس ، انا متأكدة ايلا واحد نهار الدولة ديالنا قررات انها تعطي لكل ذي حق حقه و تخلي بنادم يعيش حياتو كيفما بغا والدولة تولي مسؤولة فقط على الانظمة السياسية وماشغلهاش ف توحهات الفرد ؛ كلها يتبع العقيدة او التوجه لي بغا ، لي بغا يصوم يصوم ولي مابغاش شغلو هاداك ، لي بغا يصلي يصلي ولي مابغاش بينو و بين راسو ، لي بغا يعيش حياتو الحميمية كيفما بغا يكون يعييشها واخا يكون سوواءا ( ايطيغو ولا هومو ) ، غادي ينوض الشعب يدير قربالة حيت ماكايتقبلوش الاخر و ماكايتقبلوش واحد يدير شي حاجا مختالفة علا داكشي لي موالفين و غادي تنوض بحال سوريا حيت بطبعنا تربينا على الديكتاتورية ، حيت الديكتاتورية غادا لينا فالدم...
- اخر رسالة عندي ، ايلاشي نهار وقع تضييق على الاقليات فالدول لي كاتفرض على المواطنينن ديالها نمط حياة واحد او دين واحد او توجه واحد ف أتمنى ان الدول الاجنبية حتا هيا تدير المثل مع السكان لي فبلادهااا ولي كايتعتابرو اقلية عندها و تمارس عليهم التضييق و العزلة و السجن لك من دعا بشي دين او قرر يخرج للزنقا و يمارس الطقوس ديالو الدينية المختلفة عن توجهات المواطنين ديال هاد البلدان ... هكا فقط المغاربة و توانسا و المشارقة الخ غايحسو بدكشي لي كايطبقو على الاقليات فبلدانهم وشوف تشوف
