نصف ساعة في الجحيم

 هاد العشية كنت جالسة مع الوالدة ناشطن ضاحكن حتا كانسمعو الواليد داخل للدار و هاز واحد الكارطابل ليموني و دار هاد الحوار
ماما : اش داك صااك هاز وفين لقيتيه ؟
بابا : لقيتو مليوح ف جردة ديالنا حدا باب الدار ، و علاه ماشي هادا صاك د ولد جيران ؟؟ !
ماما : لا لا ماكانظنش !!؟
بابا : بلاتي نحلو نشوفو اش فيه
انا : لا بلاتي ماتحلو حتا نجيب تيليفون نصور
ماما : لا ماتحلوووش و ايلا كانت فيه شي قنبولة
 فهاد اللحظات كلشي متردد واش نحلو داك الكارطابل ولا لا و فهاد الاثناء مشيت و جبت تيليفون تحسبا لاي حاجا تقدر توقع ..! و بدون سابق انذار الواليد شد صاك و حلوو ! و تلاقينا فيه طابليا زرقا ديال التلاميذ ، مجموعة من الدفاتر و الكتب و بالاضافة ل الة حاسبة ديك لي غاليا ، وبزاف ديال الادوات ، يعني هنا بعدنا الاحتمال ديال ان شي حد غي بغا يتخلص من هاد صاك خصوصا و ان التواريخ لي ف الدفاتر غي ديال هاد سيمانا !
 ماما : اويلي ماكانش عليك تحلو بيديك و ايلا شي حد قتلو ولا دار ليه شي حاجة و جاو ولقاو البصمات ديالك ف صاك ؟!!
انا : وي بصاح ، ولا يمكن شي حد تعرض ليه و شفرو ولاح الكارطابل ديالو عندنا ..
بابا : سكتونا ننتوما ..دابا نشوفو شنو المعمول
 صراحة هنا الاوضاع بدات كاتشحن ، و قلت ليهم من الاخر باش تهنيو راسكم من اي مشكل غادي تديوه ل كوميساريا باش حتا السيد ايلا طرات ليه شي حاجة نحيدو علينا المسؤولية ولكن قبل قلت ليهم قلبو اشمن مؤسسة فاش كايقرااا باش ايلا قدرنا نوصلو ل الهاتف ديال دارهم وفعلا لقينا السيد كايقرا ف السادس ابتدائي ف واحد المدرسة حدانااا و لحسن الحظ كانعرفو واحد الاستاذ تما و مشا بابا يتاصل بيه و فدوك الاثناء مشيت نقلب ف الصاك ما ربما نلقا شي معلومة ولكن انا ذكية طبعا مشيت هزيت ليكاات ديال الصبعان و لبستهم و بديت كانبقشش بااش نحيد عليا اي تهمة ههههه ، ولكن مالقيت حتا شي معلومة جديدة و الوالد كان تاصل بداك الاستاد و لقا بلي فعلا داك التلميذ كايقرا عندهم و معروف عليه الشغب ، و قاليه غي خلي عندك الصاك و مايخاف والو و غايتاصل بالمدير يشوف واش يلقا شي كونطاكت مع واليديه ولا يجي للدارر ياخدوه من عندنا
 انا : باباا شوف هاد صاك ماغادي تعطيه لحد ، حيت نتا قستيه و ايلا طرات للولد شي حاجا غادي يجيو ليك. يعني غادي تمشي تديه دابا للسلطات يضبرو معاه
ماما : راه القانون مايعقلوش عليييك ...
انا : بلاتي نشعل شي لايف فالفايس باش ايلا طرات شي حاجااا يكون عندنا الدليل بلي حنا غي لقيناه
 بابا : واش باغا تشوهينا ابنتي ، ماتشعلي والووو و زيدون هاداك ماشي دليل غادي يقولك تافقتو علا هاد الخطة
 هنا يدينا كانتغاوتو شي كايشرق شي كايغرب ، و صداعنا بدا كايوصل ل الحي هههه و ماعرفناش شنو غادي نديرو بداك الصاك المشؤوم , و صافي الواليد طلع ليه دم و عاود تاصل بداك الاستاذ و قاليه انا غادي نبلغ و حنا تابعينو فالدروج و يالاه مشيت نجمع الدفاتر لي مشتيين فالارض د داك صاك باش نعطيهم ل الوالد ، و هو يصوني باب الدار ، و شكون جاااا يا ترى ، مول صاك شخصيا ، دري صغيير ولكن باينا فيه قافز و بلا مانقولكم الحيحة لي حيح عليه الواليد حتا جاو الجيران هههههه قاليه تسببتي ليا ف مشكل ، واش نتوما هاد الجيل ماكاتحشموش ، شكون عطاك الحق تلوح من فوق الكرياج د الدار ديالي صاك ديالك و كون وقعات ليك شي حاجا ، انا لي غادي يعلقووو ..و لمهم داك الدري اكتفى بالصمت و بدا كايقوليه سماح ليا اعمي راه غي شي شفارا كانو تابعين واحد البنت و انا كانعرفهم و مشيت تبعتهم و و لحت صاك هنا حتا نرجع ليه ، و هيا تقوليه ماما ، دق عليا ا ولدي و خلي ليا صاك حتا ترجع ليه ماشي تدير لينا هاد الحالة و هو يقول ليه باابا " ياك بعداا ايوا كون دابزتي مع داك شفار و قتلك و هرب و جاو و لقاو هاد صاك هنا و نصدقو ف المحاكم ؟؟؟ " ههه بابا سكتناه غي بزز..و المهم الدري مشا فحالووو و الحاصول ، ماعمرك تحل ولا تقيس شي حاجا ماعرفتيهاش ديالمن ، حيت الحوايج واخا يكونوا بساط يقدرو يتسببو فمشاكل كبار

#خربشات_مريم_بنعلي